Prindërimi pozitiv te fëmijët e vegjël 2-3 vjeç

Gurët e zhvillimit

Aftësi të tilla si mbajtja e radhës, loja simbolike dhe lojërat me top, quhen gurë zhvillimorë. Gurët e zhvillimit janë gjëra që shumica e fëmijëve mund t’i bëjnë deri në një moshë të caktuar. Fëmijët i arrijnë këta gurë në mënyrën se si luajnë, mësojnë, flasin, sillen dhe lëvizin (si hedhja, vrapimi, ekuilibri).

Për shkak të dëshirës së fëmijëve për të qenë të pavarur, kjo fazë shpesh quhet “dyvjeçari i tmerrshëm”. Megjithatë, kjo mund të jetë një periudhë emocionuese për prindërit dhe fëmijët e vegjël. Fëmijët do të përjetojnë ndryshime të mëdha të të menduarit, të mësuarit, të marrëdhënies sociale dhe gjendjes emocionale që do t’i ndihmojë ata të eksplorojnë botën e tyre të re dhe ta kuptojnë atë. Gjatë kësaj faze, fëmijët e vegjël duhet të jenë në gjendje të ndjekin udhëzime me dy ose tre hapa, të renditin objektet sipas formës dhe ngjyrës, të imitojnë veprimet e të rriturve dhe shokëve në lojë dhe të shprehin një gamë të gjerë emocionesh.

Këshilla për një prindërim pozitiv

Më poshtë janë disa nga gjërat që ju si prind mund të bëni për të ndihmuar vogëlushin tuaj gjatë kësaj kohe:

• Vendosni një kohë të veçantë për të lexuar libra me vogëlushin tuaj.
• Inkurajoni fëmijën tuaj të marrë pjesë në lojën ‘me sikur’.
• Ndihmojeni fëmijën tuaj të eksplorojë gjërat dhe mjedisin përreth duke dalë shpesh në shëtitje ose udhëtime.
• Inkurajoni fëmijën tuaj të tregojë emrin dhe moshën e tij.
• Mësojini fëmijës tuaj këngë të thjeshta e të përshtatshme për moshën dhe këndojini së bashku.
• Jepini fëmijës tuaj vëmendjen e duhur dhe lavdërojeni kur ai/ajo ndjek udhëzimet dhe tregon sjellje pozitive dhe kufizoni vëmendjen për sjellje sfiduese si zemërimi. Mësojini fëmijës tuaj mënyra të pranueshme dhe të duhura për të treguar se është e mërzitur.

Siguria e fëmijës vjen e para

Për shkak se fëmija juaj lëviz më shumë në këtë moshë, ai do të hasë edhe më shumë rreziqe. Situatat e rrezikshme mund të ndodhin shpejt, ndaj jinni të vëmendshëm. Këtu janë disa këshilla për t’ju ndihmuar të mbani të sigurt fëmijën tuaj:

• MOS e lini fëmijën tuaj pranë vendeve me ujë (për shembull, vaska, pishina, pellgje, liqene, det) pa e parë dikush. Rrethojini pishinat e oborrit të shtëpisë. Mbytja është shkaku kryesor i lëndimeve dhe vdekjeve në këtë grupmoshë.
• Inkurajoni fëmijën tuaj të qëndrojë ulur kur ha dhe të përtypë ushqimin e tij tërësisht, për të parandaluar mbytjen.
• Kontrolloni shpesh lodrat për pjesë të lirshme ose të thyera.
• Inkurajoni vogëlushin tuaj që të mos vendosë lapsa ose shkumësa në gojë kur ngjyros ose vizaton.
• MOS mbani pije të nxehta ndërsa fëmija është ulur në prehrin tuaj. Lëvizjet e papritura mund të shkaktojnë derdhje dhe mund të rezultojnë në djegien e fëmijës suaj.
• Gjithmonë vendoseni fëmijën tuaj në një sexholino të përshtatshme për të kur udhëtoni me makinë, qoftë edhe për distanca të shkurtra.  

Trupa të shëndetshëm

• Bisedoni me stafin e kopshtit të fëmijës për të parë nëse ata shërbejnë ushqime dhe pije të shëndetshme dhe nëse e kufizojnë kohën e televizorit apo ekraneve të tjera.
• Vogëlushi juaj mund të ndryshojë ushqimin që i pëlqen nga dita në ditë. Është një sjellje normale dhe është më mirë të mos e shqetësoni. Nxiteni të provojë ushqime të reja duke i ofruar kafshata të vogla për shije.
• Mbani televizorët jashtë dhomës së gjumit të fëmijës suaj. Vendosni kufij për kohën para ekranit për fëmijën tuaj në jo më shumë se 1 orë në ditë në një program cilësor, në shtëpi, shkollë ose kujdes passhkollor dhe krijoni një plan për kohën para ekranit për familjen tuaj.
• Inkurajoni lojën e lirë sa më shumë që të jetë e mundur. Kjo e ndihmon fëmijën tuaj të qëndrojë aktiv dhe i fortë dhe e ndihmon atë të zhvillojë aftësitë motorike.
• Sigurohuni që fëmija juaj të flejë sasinë e rekomanduar të gjumit çdo natë.